Bloei op dea hout en het laatste woord Fries

Provinsje Fryslân

Deputearre fan kultuer, Jannewietske de Vries

Underwerp: Fryske literatuer  

Titel: "Bloei op dea hout en het laatste woord Fries." 

Subtitel: "In oanklacht"

Fan: Eeltsje Hettinga

Ljouwert, 26 oktober 2012

Bêste deputearre De Vries,

Yn de nije Kultuernota wurdt útsteld om de Obe Postma- en de Fedde Schurerpriis (foar resp. de bêste oersetting en it bêste literêre debút oer de lêste trije jier) sneuvelje te litten. Jo arguminten om beide prizen oan Blauwe Fedde mei te jaan, binne slaggen yn de loft, want net goed fan feiten ûnderboud. Jo sizze de literatuer stimulearje te wollen, mar troch jo letterebelied spanne jo it hynder achter de wein. In Fryske skriuwer fan kwizekwânsje stelt yn dizzen: "Sa wol ik eins net mear fierder. Miskien moat ik it dêrom mar ris yn it Nederlânsk besykje.”

Mei troch it oersetwurk fan minsken as Klaas Bruinsma, Jarich Hoekstra en tal fan oare Obe Postmapriiswinders is it Frysk by de jierren lâns mear oansjen jûn. Tink oan de slagge oersettingen fan it grutte ’Bommel-wurk’ fan Marten Toonder troch Jarich Hoekstra en Harke Bremer of oan de fernimstige Shakespeare- en Tsjechov-oersettingen fan toanielfrou pur sang, Tryntsje van der Zee silger. En wat te tinken fan de yn it Frysk kwêkjende Donald Duck dy't by tsientûzenen de toanbank oer gie?

In soartgelikens súksesferhaal jildt foar de wilens tritich jier âlde Fedde Schurerpriis. Mei troch dy priis binne tal fan talinten, fan Harmen Wind oant en mei Jaap Krol djipper yn de Fryske literatuer behelle. Elk fan harren hat op syn/har wize de Fryske literatuer nei in heger nivo tild. Pratend oer it gewicht, de útwurking en it effekt fan dy priis kin ûnder mear dit sein wurde: Sûnder ‘de Fedde’, en dêr stek ik myn hân foar yn it fjoer, hie der bgl. nea in blêd as Kistwurk west, it literêre tydskrift fan Elske Schotanus, Eric Hoekstra en ûnderskreaune.

Hettinga jout syn 'Fedde' fan '98 werom oan Provinsje

Mar al dy arguminten telle net foar jo, want jo prestearje it, bêste deputearre, om te sizzen dat "dy prizen net genôch wurdearre wurde, in te lytse bekendheid hawwe en in te min effekt op it literêre fjild en de lêzers.” Dat binne dus slaggen yn de loft; wat mear fjildûndersyk en de feiten hienen jo it tsjindiel sjen litte kinnen. Hawar, hat it al net ris faker bliken dien dat jo net alhiel op ’e hichte wiene mei wat der yn it fjild omgiet? Dan haw ik it net allinnich oer it gegeven dat jo okkerdeis net wisten dat jo provinsje yn it ramt fan jo projekt CH2018 meibetelle oan rapporten fan alderhande rjochtse, folksnasjonalistyske snit, mar ék oer gâns simpeler saken lykas jo sizzen by de útrikking fan ‘de Fedde-2012’ dat “de Rely Jorritsmapriis in priis foar debutanten is.”

Privatisearring

Fan ’t jier hawwe jo de ferantwurdlikheid foar de organisaasje fan beide prizen, dy’t de provinsje NB al yn 2011 útrikke moatten hie, nei Tresoar trochskood, mei as foarnimmen om 1) de útfiering fan it letterebelied “safolle mooglik del te lizzen by ien partij” en 2) in opstapke te meitsjen nei de ‘vermarkting’ fan it prizestelsel, omdat jo de literêre prizeboel net ta “de kearndoelen fan de provinsje” rekkenje.

Wat it earste punt oangiet, dêrfan moat steld wurde dat de macht wol hiel sterk by ien ynstitút te lizzen komt, om it mar net te hawwen oer it gefaar fan alderlei foarmen fan ynstitusjonele repressiviteit. Je sille mar yn tsjok waar reitsje mei it ynstitusjonele skaai... Wat it twadde punt oangiet, dêrby traktearje jo de Fryske literatuer op in sigaar út eigen doaze. De pear luzige sinten dy’t jo oerhâlde fan jo likwidaasje fan ‘de Fedde’ en ‘de Obe’ – mei-inoar seis tûzen Euro – hevelje jo oer nei ‘de Gysbert’. Yn de media litte jo dêrnei, hiel triomfantlik, witte dat jo it prizejild foar ‘de Gysbert’ mei 5000 Euro ferheegje nei 10.000 Euro. 

By de omfoarming fan de rest fan it prizestelsel tidigje jo derop dat dy tenei bestuivere wurde kin troch it bedriuwslibben en de útjouwers. Jo litte it dêrby foarkomme as soe de literêre ynfrastruktuer by in minderheidstaal as it Frysk itselde wêze as dy by it Nederlânsk literêre systeem. Dat is besiden de werklikheid. De útjouwers dy’t nóch Fryske boeken yn ’e hannel bringe, bêste deputearre, doare it ‘brede’ boek, de lektuer, noch wol oan, mar skrilje wat langer wat mear tebek foar it útjaan fan it mear literêr rjochte boek. Slimmer, guon skriuwers wurde troch harren útjouwers yn it foar twongen om mei te beteljen oan har eigen útjeften, lit stean dat dy útjouwers dus jild (oer) hawwe foar nije, opsnolke literêre prizen. 

Koely fan de kultuer

Dêr’t de Fryske skriuwer bytiden fan earmoed amper de klink fan de doar fine kin, dêr wapperje by it projekt ‘Fryslân-Ljouwert 2018’ de Euro’s mei miljoenen ta de finsters fan it provinsjehûs út. Bûten roai. En dêr’t de Frysktalige literêre skriuwer hâlden en kearen hat om syn/har boeken ûnder de minsken te krijen, dêr sille Tresoar en it Nederlands Letterenfonds aanst mei de glossy brosjuere ‘Books from Fryslân’, in djoer betelle literatueryntendant en in nust hol pratende kommunikaasje- en prosesmanagers nei de Frankfurter Buchmesse om de Fryske literatuer mear kasjet te jaan. 

Dat is moai, mar it is de wrâld op syn kop. Of lit ik it oars sizze: Wat jo stimulearje, bêste deputearre, is bloei op dea hout.

By dat lêste moat ek tocht wurde oan in fierhinne útklaaide fakulteit Frysk yn Grins – literatuerûndersyk wurdt dêr amper noch dien – of oan in Fryske Akademy dy’t sûnt 2004 al gjin literatuerhistoarikus mear yn tsjinst hat. En ek al lûke jo yn de nije Kultuernota 2013-2016 mear jild út foar de taal en it ûnderwiis, - pico bello, two thumbs up – de literêre ynfrastruktuer bliuwt ûnder druk stean. De oarsaken derfan iensidich by de provinsje del te lizzen, dat is te maklik, dêrfoar is de ûnderlizzende problematyk ek te kompleks (ûntlêzing, in te lytse merk, in ekonomysk delgeand tij ensfh.), dat besef ik, mar kin it dêr by jo oan de Twiebaksmerk ek in krom minder des Halbe Z., as it om de Keunst sels giet?

It is net allinnich troch it nasjonale kultuerbewâld fan Zijlstra & Ko, mar ek troch de ynrjochting fan in letterebelied as dat fan jo dat de Frysktalige skriuwer sa linkenlytsen redusearre is ta de koely fan de kultuer. Ien fan de meast foaroansteande skriuwers fan it lêste desennium, Aggie van der Meer wurdt mei troch jo belied de tinte fan de Frysktalige literatuer útjage. Van der Meer: “It literêre guod komt hieltiten mear yn ’e knipe. Ik ha it jild fan de Piter Jellespriis [de skriuwster krige dy priis ferline jier foar har roman Oerfeart, e.h.] brûke moatten om de útjeften fan myn twa novellen en myn yn desimber te ferskinen dichtbondel te beteljen. Sa wol ik eins net mear fierder.  Miskien moat ik it dêrom mar ris yn it Nederlânsk besykje.”

As dat de bedoeling fan it provinsjaal kultuerbelied is, bêste deputearre, dan sis ik mei in eardere kollega, de dichter, keunsthistoarikus en âld direkteur fan de Princessehof, Hessel Miedema: “Jonges ik ha myn plicht dien foar it Heitelân oer siz mar [...] En dit is dan meteen het laatste woord / Fries dat ik heb geschreven ook.”                    

Eeltsje Hettinga

  

PS. De yn 2006 yn 't libben roppen Fedde Schurerpublykspriis kin fansels wol ôfskaft wurde, al wie it mar fanwegen it ûnderlizzende fraudegefoelige ferkiezingssysteem,sa’t dat troch ûnderskate bloggers oantoand is.

Bas Jan Ader - de dream, de reis - Lânskippen 3

DE FREUGDE FAN IT SJEN
DAT SEAR DOCH

Wat beweecht ien om allinnich yn in sylboatsje fan amper fjouwer meter de Atlantyske Oseaan oer te stekken? Keunstner Bas Jan Ader (1942-1975) ferge de goaden, doe’t er, útswaaid troch syn frou, by it Amerikaanske Cape Cod de kant fan Europa útsette. As Ikarus rikte Ader nei it heechste. Syn reis beskôge er as 'a act of performance'. It keunstprojekt wie ûnderdiel fan in triptyk dy’t er ‘In search of the miraculous’ neamd hie, in trijelûk, dêr’t in nachtlike, by de Grutte Oseaan einigjende fototocht troch Los Angeles it begjin fan wie. Ader syn foto–, film– en performancewurk is in pynlik yngeande ferkenningstocht nei de grinzen tusken keunst en libben en it besykjen dy te sljochtsjen. By dat ûndersyk moast de keunstner belies jaan, Spaanske fiskers fûnen syn boatsje ‘Ocean Wave’ werom ûnder de kust fan Ierlân. Fan de siler sels gjin spoar. 

Steeds heviger bezweken / naar het ontwijkend teeken / stegen wij en verdwenen. / Dy rigels út ‘Het lied der dwaze bijen’ fan Martinus Nijhoff kamen yn my op by it sjen fan Please, don’t leave me, de útstalling dy’t it museum Boijmans van Beuningen in jier as wat ferlyn oan it relatyf lytse oeuvre fan Bas Jan Ader wijde. Mei-inoar gie it om in stik as fyftjin objekten, ynstallaasjes en skilderijen. Dêrnjonken wie  der in part fan Ader syn dokumintaasje te sjen: notysjeboekjes, gedichten en alderhande statements lykas 'Greetings from beautiful Ader Falls' of dizze, 'The sea, the land, the artist has with great sadness known they too will be no more'. 

Ader wie obsedearre troch de beweging, macht en útwurking fan de swiertekrêft. It grutste en wichtichste part fan syn wurk bestiet út ensenearre falpartijen, fêstlein yn foto’s en koarte swart-wyt filmkes. By syn performances brûkte er gauris it eigen lichem  as (boarne- en ûnderfinings) -materiaal, lykas yn de stomme film: Fall 1, 1970 Los Angeles. Ader sit deagemoedereard op in stoel op de naal fan it dak fan syn hûs yn Claremont, falt skean oer ’e side, donderet mei stoel en al fan it dak, besiket him yn syn fal fergees oan de daksgoate fêst te gripen om dan wei te wurden yn hage en strewel, de ierde. Ein film. Part twa hjit: Fall 2, 1970 Amsterdam. In ferlittene sneintemoarn, midsimmer, nimmen te sjen, de stêd sliept, de keunstner komt út in sydstrjitte fan de Reguliersgracht fytsen, rydt – yn ’e lofterhân in boskje blommen – rjochtút by de kaaimuorre del, falt foaroer, stekt, as yn in refleks, de earmen nei foaren, as besocht er syn (ûnder)gong noch tsjin te kearen, mar giet dan, klap, bats, plûns, kopke ûnder. 

It ynsetten fan it eigen lichem wie by Ader gjin doel, sa't dat gauris it gefal is by de alderhande foarmen fan hjoeddeiske body-art, nee, foar him wie it in middel. It gie him om it konsept; de Idee gie foar en boppe de foarm. Dat jildt ek foar de foto (en film) 'I am too sad to tell you' út 1970 dêr’t er himsels, al gûlend, close-up yn byld bringt. Op it earste gesicht docht dat nochal patetysk oan, suver teatraal, mar by neier ynsjen giet it, nettsjinsteande it ensenearre gehiel, ék dêryn, om it tema fan de fal: de triennen dy’t nei ûnder streame. De opnamen litte jin tinke oan de smertlike ferstjerrensfoto’s fan skilder Sjoerd Janzen yn de katalogus by syn lêste útstalling yn Museum Belvédère.

Ader syn wurken jouwe de freugde fan it sjen dat sear docht. De pine fan syn bonken brekkende falpartijen lit er yn dizze slapstickeftige filmkes en it byhearrende fotowurk net sjen. Him giet it om de fal an sich, om de essinsje fan it loslitten, om dy iene ‘split second’, wêryn’t de minske, los fan de fertroude ierde, gjin oare kar hat as him oer te jaan oan it ûnbekende. Syn fallen is in ferdwinen, in ‘falen’ ek, of, om in oare betsjutting fan it tiidwurd te nimmen: in ‘sneuvelen’. Leit dêryn mooglik ek de titel opsletten fan dat iene Ader-statement dat er op in stel garaazjedoarren skildere hie, nammentlik: ‘Please, don’t leave me?’ Hat syn soloreis oer de Oseaan faaks in moedwillige foarm fan sneuveljen west? Azemt syn ûndernimmen de geast fan Albert Camus, foar wa’t yn dit libben it al of net dwaan fan selsmoard de iennichste fraach wie dy’t der werklik ta die? [Keunsthistoarikus Huub Mous hat yn dizzen mei rjocht op de roman La Chute fan Camus wiisd.] It bliuwt rieden, by alle ferklearrings oangeande it mystearje fan syn weiwurden op see mankearret it him oan feitlik of logysk bewiis. 

De dûbele ferdwining

De skriuwer-keunstners Koos Dalstra en Marion van Wijk hawwe ûndersyk dien nei it ‘marine dossier’ oer de oankomst fan de ‘Ocean Wave’. Yn de simmer fan 2005 kaam der, tritich jier nei dato, noch in geheim rapport fan de Spaanske autoriteiten boppe wetter, dêr’t út bliken die dat by it opbringen fan Ader syn boatsje yn de havenstêd La Coruña alle lochboeken en seekaarten noch oanwêzich west hienen. Kearnfraach yn it biografyske essay fan Dalstra en Van Wijk oer Ader – se jouwe ûnder mear in rekonstruksje fan syn Atlantyske tocht mei help fan fergelykbere maritime literatuer – seit dan ek: Wêr binne syn lochboeken? Salang’t dy net boppe wetter komme, sil der ek gjin antwurd wêze op de fraach: Wat is der, ien kear bûten de kust fan Cape Cod, bard, wat hat him nei de haaien holpen, of mear yn it algemien, wat is fan ús fal de oarsprong?

Bas Jan Ader (1942) waard grutbrocht yn it buorskip Hongerige Wolf by Winschoten. Sawol syn heit Bastiaan Jan Ader as syn mem, de skriuwster Johanna Appels, wienen fan professy dominy. Ader sr. rekke yn de oarloch yn it ferset, holp Joaden, ûnderdûkers en Ingelske piloaten, oant it mis gie. Hy waard oppakt, bedarre yn it gefang yn Amsterdam en waard ein 1944 by Veenendaal fusillearre. Oer it mooglike ferbân tusken it tema fan de fal en syn fusillearre heit sei Ader jr. trije jier foar syn dea: ‘Dat is natuurlijk een veel te anekdotische benadering. Alles is tragisch omdat de mens altijd zijn controle verliest over processen, over de materie, over zijn eigen gevoelens. Dat is een veel universelere tragiek, en die kun je niet visualiseren vanuit de anekdote.’ 

 

-->

Wa’t de biografy fan Ader der op neirint, ûntkomt net oan de yndruk fan de romantyske rebel. De middelbere skoalle makke er net ôf, want net te hanthavenjen. Dat gou ek foar syn blau-moandei-ferbliuw op it Instituut voor Kunstnijverheids-onderwijs yn Amsterdam, dêr’t er mei Wim T. Schippers en Ger van Elk yn ’e klasse siet. Fia in ynternasjonaal útwikselingprogramma kaam er yn Washington telâne, folge in tal keunstolleezjes en hie der, amper njoggentjin jier, syn earste eksposysje. Fan The Washington Post en Voice of America krige er loovjende resinsjes. Nimmen minder as Jacqueline Kennedy kocht wurk fan him. Ader wie dé man, doe’t er yn Nederlân weromkaam. Lang bleau er net. De ûnrêst wie te grut, Nederlân te lyts. Him jage om it mei Nijhoff te sizzen ‘een geur van hooger honing.’

Yn 1961 sette er nei Spanje, meunstere yn Marokko as bemanningslid oan op in jacht dat fia it Panamakanaal nei Kalifornië gie. Dêr sette er him ek nei wenjen, helle syn MFA (Master of Fine Arts), studearre fan 1967 oant 1969 filosofy, in stúdzje dêr’t er him benammen yn útlei op it wurk fan Hegel, Wittgenstein en de Russyske mystikus Ouspensky, oan waans wurk er de titel In search of the miraculous ûntliende. Oan de Universiteit fan Irvine, súd fan Los Angeles, dosearre er in skoftke keunstskiednis. Wat dêrby de klam krige, wie de relaasje tusken libben en keunst, tusken performance en fotografy & film.

 

-->

Neatigens 

Mei syn wurk hat er in wichtige bydrage jûn oan de konseptuele keunst fan de jierren sechstich en santich. Yn Nederlân wienen minsken as Wim T. Schippers, Ger van Elk en Willem de Ridder op soartgelikense wize oan ’e gong, mar it wurk fan Ader wie en is oars: minder iroanysk en mear romantysk. Dat is bygelyks te sjen oan Farewell to faraway Friends, in kleure-opname fan in ferlitten baai, mei op de rotsen de iensume figuer fan Ader dy’t yn it ûndergean fan de sinne oer it wetter stoarret, net liker as wie er Der Wanderer sels, de iensume op de rotsen steande figuer fan de Romantiker pur sang: de Dútske lânskipsskilder Caspar David Friedrich. Ek al boartet Ader hjir in yntertekstueel spul, it is om ien fan syn eigen statements oan te heljen 'the artist contemplating the forces of nature'.

Wa’t djipper ûnder de hûd fan it wurk fan Ader dûkt, wurdt dúdlik hoe’t er oan it wrakseljen west hat mei de tema’s fan neatigens en destruksje, foar safier’t it al net om selsdestruksje gie. Irony? Nee, alles wat út dit wurk sprekt, tsjûget fan in eksistinsjele needsaak. Pynlik en ûntheisterjend is it projekt Light vulnerable objects threatened by eight cement bricks: boppe oer de grûn lizzende objekten lykas gloeilampen, aaien, in jierdeistaart en in portret hingje grouwe betonblokken, mei in stanleymes snijt Ader de triedden troch en lit alles wat der ûnder leit ferpletterje. It is deselde fal as dy yn it troch Ader op film foarlêzen ferhaal The boy who fell over the Niagara Falls, in dramatysk teltsje meidat de haadfiguer, krekt foardat er by de wetterfallen delstoart, noch alle war docht om de motor fan syn boatsje yn de achterút te krijen.

Ader hie yn dy dagen syn atelier op Sunset Boulevard yn Los Angeles. De libbensstyl dy’t er der yn dy tidi op neihold wie neffens Ger van Elk by it desperate om’t ôf, nachts stroopte er de kroegen fan Los Angeles ôf, oerdeis spekulearre er yn grûnstoffen, in hannel, dêr’t er bytiden de grutste ferliezen by makke. Oer syn ferhâlding mei Los Angeles sei er oait: ‘Ik voel me steeds klein door haar enorme schaal, waardeer als geen ander het eenzaam mooie van Freeways bij nacht. Zelfs rampen, grote branden en aardbevingen hebben mij hier doen kleven in plaats van mij te verjagen. Ik zal moeten (kursyf e.h.) toegeven gefascineerd te zijn door de tomeloze bedreiging die de natuur hier boven ons houdt. Ik houd van deze wilde romantische wereldstad van uitersten.’

Yn ’e hjerst fan 1975 waard yn it Grinzer Museum mei spanning útsjoen nei de komst fan Ader, fan wa’t men in útstalling yn tarieding hie. Al wa’t opdaagjen kaam, net Bas Jan Ader. Syn broer Erik Ader, in yn Noorwegen wenjend ynternasjonaal diplomaat en seesiler, neamde syn seereis ‘de ultieme zoektocht naar het metafysische’. Sels tink ik: Syn weachhalzerij moat in sublime foarm fan nihilisme west ha. Hoe’t it ek wêze mei, goede keunst, lykas dy fan de keunstner Ader, jout net allinne fragen, ek lit se har ek net foar ien ‘god’ fange.

It wie op in sneintemoarn, oktober 1975, dat syn telepatysk bejeftige mem it gedicht From the deep waters of sleep skreau, mei dêryn ûnder mear dizze strofe: ‘A white body of a man, rocked in the arms of the waves,/ is very small too. / What are we in the infinity of ocean and sky’?

© Eeltsje Hettinga

(Boppesteand artikel hat earder yn it tydsrkift de Moanne publisearre west, in pear troch de tiid ynhelle details ha ik oanpast.)  

Sj. ek blogspot Eeltsje Hettinga 06-02: Bas Jan Ader - de dôve oseaan - lânskippen 1

Sj. ek blogspot Eeltsje Hettinga 10-02: Bas Jan Ader - dokumintêre - lânskippen 2  

Bas Jan Ader – dokumintêre – Lânskippen 2

Here is always somewhere else

Filmmakker Rene Daalder fertelt yn de dokumintêre Here is always somewhere else it altemets ûntheisterjende ferhaal oer Bas Jan Ader, de Nederlânsk-Kalifornyske keunstner dy’t yn 1975 besocht om yn in sylboatsje fan noch gjin fjouwerenheale meter de Atlantyske Oseaan oer te stekken. Net al te fier út de kust fan Ierlân, rekke er wei, foargoed ferdwûn.

Ader syn oerstek wie ûnderdiel fan it keunstprojekt, it trijelûk In Search of the Miraculous, dêr’t it earste part fan makke wie yn Claremont, ien fan de stêden binnen de metropoal Los Angeles. De werklike driuw fan syn sykjen bliuwt oant op de dei fan hjoed in riedsel. ‘A true disappearence without a trace.’\

Daalder hat by de rekonstruksje fan it libben en wurk fan de keunstner.Bas Jan Ader syn eigen bestean as emigrant yn Kalifornia as útgongspunt nommen. Dat smyt hjir en dêr prachtige fragminten op: tochten troch Noard-Grins - Ader kaam út dy kriten -, fraachpetearen mei Ger van Elk en reizen troch Los Angeles, dêr't de dokumintêremakker ûnder mear ek op besite is by Ader syn widdo, Mary Sue Andersen.... 

Sj. ek blogspot 06-02-201 Bas Jan Ader - de dôve oseaan 1